بامبومبا

خرداد ۲۶, ۱۳۹۵

بامباچادان باشلار،

بومبالارا قدر؛

ائودن ائشیگه،

اوشاقدان بؤیوگه؛

بامباچا باشا،

بومبالار شهره؛

هردن دیزیـــمیزه چالیریق،

                     آجی بیر خبره!

آچیلی بیر کالیدوسکوپ ایمیش

                _بو شئیطان آدلی جعبه­!

دَییشیر پازل پازل

دوزولور پرم پرم

قولاقدان واکسینه؛­

_فوویسم بیر تابلو تک_

                گؤزلره ایینه!

*

بامبوبا

اووووی!

یونسکونون باش ساغلیغینا

اود توتدی حلبین بازاری دا

          _گؤرن کیمه دسماللیق چیخدی؟

اولمایا سویولان دریسی تک

سؤکولدی نسیمی­نین قبیری ده؟

*

بامبومبا

اووووی!

هانسی اوشاق اوچونتو آلتیندا

                            بویو قیسیلدی؟

هانسی قادین دوشمانیندان

              بیر آیری اوشاغا بویلو قالدی؟

*

دَییش کانالی بیر فیلم چکیجیلیگینه

بیر رکلام آللانیشینا

بیر کلیپین کئچیجی کئفینه

هارا پارتلادی،

هارا اوچدو،

هارا یاندی،

بیزه نه؟

*

بیز دولار دره‌سینه بوشالیریق، هله

باهالیقدان اوجوزلاشیب،

سویوق تریمیزه بله‌شیریک؛

بلکه اؤزوموز ده هؤپورلمک اوچون،

بورولوب، بلله‌لشیریک!

*

اوووی

بامبومبا

هانسی باشا بامباچا،

هانسی شهره بومبا؟!

اووووووی!

ممکن است این نوشته‌ها را هم بپسندید ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *