کوچه

خرداد ۲۶, ۱۳۹۵

آیایشیق بیر گئجه سنسیز او گذردن یئنه کئچدیم
باشا باش گؤز باخیش اولدوم، آراییب ایزلری سئچدیم
سنی گؤرمک هوسیایله، بیر جوشوب مین کره داشدیم
یئنه اولدوم دلی سئودالی کی واردیم!

c25b1820c944e6ebad7e0fd1df0815da

آیایشیق بیر گئجه سنسیز او گذردن یئنه کئچدیم
باشا باش گؤز باخیش اولدوم، آراییب ایزلری سئچدیم
سنی گؤرمک هوسیایله، بیر جوشوب مین کره داشدیم
یئنه اولدوم دلی سئودالی کی واردیم!

یوز گولوش خاطیره گولدو جان ائویمده
یوز عطیر خاطیره باغلاردا ساچیلدی
یادیوا گوللر آچیلدی

یادیما دوشدو کی بیرلیکده گئجه اوردا گزرکن
گؤیلوموز ایستیه‌لی بیر هاوادا قول ـ قاناد آچدیق
سو آخارکن بیز اوتوردوق،
یئر گؤیون سیرّی تؤکولموش باخیشیندا
باخیبان حیران اولوردوم آخیشیندا
گؤی دورو، یئر نئجه سس‌سیز
باخت گولوردو داها سؤز سوز
آی ساچاقلارین آچیبدا سویا تؤکدو
آغاجین دال بوداغیایسه آیا کؤچدو
چؤل‌ده گوللر، داغدا داشلار،
دینله‌ییر، قوشلار اوخوردو

یادیما گلدی دئیردین کی بو سئودانی بوراخ سن!
بیرجه آن باخ سویا آرخلاردان آخارکن
سو دا، سئودا دا کئچرکن اؤتوشـَندیر
اورَگین اؤزگه‌لرایله سئویشـَندیر
اونودا بیلمک ایچون گل بو شهردن یولا چیخ سن!

سئودادان واز کئچه‌لیم‌می؟! کئچه بیلمم؛
یولا سنسیز چیخا بیلمم، چیخا بیلمم.
ایلک دفعه سنلی هاوالاردا اوچاندا
بیر گؤیرچین اولالی ائیوانا قوندوم
بیر داش آتدین نه سووُشدوم، نه قووُلدوم
سن کی بیر اووچو اولوب، منسه ده بیر جیرانا دؤندوم
تورووا دوشمک ایچون چؤلده دولاندیم
سئودادان واز کئچه بیلمم
یولا سنسیز چیخا بیلمم، چیخا بیلمم…!

آغاجین گؤزلری دولدو، یاشی دامدی
قوش چیغیردی گؤیه اوچدو
یاش گلیب گؤزلریوه حلقه وورولدو
آیسا‌ باخدی آجی گولدو.

داها سس گلمه‌دی سندن
آجیلار آلدی منی، غملره دالدیم
نه قیریلدیم، نه اوساندیم
سووُشوب حز‌نده سن‌سیز او گئجه‌م ده گئجه‌لر ده
نه ده اینجیک‌لیوه بیر چاتدی خبر ده
کئچمه‌دون بیر داها سن او کوچه‌لردن
آمما سنسیز،
آمما سنسیز من نه حالدا اولاردان یئنه کئچدیم.

ممکن است این نوشته‌ها را هم بپسندید ...

یک نظر

  1. يونس بهلولي گفت:

    سلام
    چوخ گؤزل قلمیز وار ، اللریزه ساغلیق،سیزین اولماقیز بیزیم فخریمیزدی
    یوخودا آییلماق بیتیکین ده من آلیب و اؤخومیشام چوخ گوزل دی

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *