نارین لار

خرداد ۲۶, ۱۳۹۵

من سنین گؤیووُ ایتیردیم
سن منیم یئریمی!
*
هاوا هئیوا ایی وئریر،
سن آلما سسله ییرسن!
*
ایندی گلیم یا گلمه ییم؟
*
ال-اله دویمه دله
گؤر نه لری وئردیک یئله!
*
گؤرمزیانا سوُوشانیم،
قورخمازیانا سووُشایدین!
*
ایش ایشی گتیردی،
آرشین بئزدیردی!
 *
هارای سیز آی سیزام
گون آراسیندا
*
یئرین یئریشینی یئرییریک
تالانماغا دوغرو!
*
بیر سرو قدّین بویونا
قیسّا گلدی چادیرا!
*
باهار دئییلدین؛
باهارا باهانا ایدین!
*
سؤزوم غوربته دوشدو،
اؤزوم وطنه!
*
دونن زنجیرله مه لین یییه دورمالیدی،
بو گون زنجیرله نه نین!
*
بیرگون گلر گون چیخار،
گونون هرگونکو چیخیشینا گولریک!
*
تلفون
منه قوربان کسیردی
سسی کسیلدی!
*
ائولی!
ائو کی وار چاتماغا
آوارالیغین اوستون اؤرتسون!
*
ایستی-سویوق
جانیم ایستی، یئریم سویوق!
*
دونیانین گئدیش یول لاری‌نین
قولتوق آغاج لاری:
           دمیر یولو
*
سؤزو کی اؤپمک اولماز؛
دوداق لارین دا یاساق!
*
رُل بیزیم الیمیزده؛
هریان کی یول دئییل.
*
اوزون سؤزون قیساسی،
شعرین یونتالانمیشی دی
                   _سئوادا!
*
چانتامی باغلایاندا توی توتدون،
بس نییه تویومو توتاندا یاس آغلادین؟!
*
آغاج قالماییب بورالاردا
بیر کیبریت چوپو آلام یادیوا
*
بو اوغرو اوغرولوقدو
من‌ ده سنین ساققیزیوی اوغورلادیم!
*
قارا گئیمیشم اؤز اؤلومه
اؤلمه میش آغیرلانمیشام، دیریمه!
*
یاخجی کی سن وارسان _او اوزاقلیغدا،
بو قدر یوخون یئرینه _بو یاخینلیغدا!
*
قوجاقلاماغا یوللانیر قول لاریم
قالانمایانیمی!
*
سن بیرآیاق گئتمیشدین
من ایکی آیاغیمی بیر باشماغا تیکمیشدیم!
*
یوخودا اویاتدیم
منی ده گؤرسون یوخولاریندا
*
بیر درین درمیشم
بو دؤورون دایازلیغیندان،
بوش الیمدن آل!
*
دین،   دین،    دین،
دینمه!
*
رنگی قاچمیش حنادی،
هاوا؛
سؤزودَییشمه یه!
*
تکجه بولود بیلر
دنیزین جانی دا یوونماق ایستر؟!
*
گؤر نه شعرلریمه بنزیسن
سونرالاریمداکی تانیش!
*
آزدی سؤز آغزیمدا
آزدیردی آغزیمی دا
*
نئچه له مه دین،
هئچ ائله دین!
*
گوج دوغانین دی،
دوغولان سنین؛
دونیا بئله یییه له نیر!
*
گاه ایشیلدیر
       گاه اوشودور
                      _آی!
*
آرزیم گؤزومده قالمادی؛
گؤزوم آرزیمدا قالدی
          _یازی لاریمدا!
*
“قو ووروسان…”
قولاغیمی توتدولار!
*
گونشلی یئرده، ایشیق اوزو گؤرمه دیم؛
آغلیغیما اوزرلیک سالدی
سئوگیلیم!
*
اؤپ گئت،
قوجاقلاسان قالاسان!
*
سئومه یه،
یوخسا،
سئویشمه یه می سئویلیریک؟!
*
اوزوم یولا، گؤزوم سنه
فه دم دمه، دامدان داما!
*
گؤزلریمه دسمال باغلادیم،
باشیم آغریماسین!
*
سامان تاخیلسیز اوچار
خیال عاغیلسیز!
*
هئچدن هَـیجانلاندیم،
پوچدان اوچسام
گؤر نئجه اولار؟!
*
گؤزلویوم ضعیفله ییب
گؤزلریم ایتی لنندن!
*
بیریسی چکیلن گونو ایزله ییر،
بیریسی چتیر گؤتوروب، یاغیش گؤزله ییر!
*
گئت ها گئت.
اوزون یولون اورتاسیندا،
نه گئده بیل، نه قاییت!
*
سوزدور باخیشیوی!
سئوگی دم چکیب گؤزلرینده!
*
گؤزلرین آلدی منی،
گؤزلرین آسیلی سالدی منی!
*
سو وریانی ییخان،
هر یانی کی یوخ!
*
آچارلارین چوخلوغوندان دی
                    آچیلمیر قاپی لار
یوخسا، قاپی لارین دَییشیکلیییندن؟!
*
یوخومدا اؤلموشدوم،
سحری اویالدان اولمادی!
*
سن توزاناق قوپاردیرسان…
من توز سیلیرم…
*
باها باشا گلدین
           _باشیمیزین باهاسینا!
*
چاتمازسان!
منی اؤزگه گزدیرن!
*
اَرسین لرین اوزونلوغونا باخ،
      چؤرگی کسیلن لرین گؤزونه!
*
“گوودوش دیغیرلانار…”
دووارا دَیر!
*
ایستیردیم تئز یاتسین
یوخوسونا گئدم!
*
“یارب بلای عشق‌له قیل آشنا منی”
قیلیب دا، سجده‌ده ساخلادی بیله‌می!
*
حامام‌لار جینسیز دی،
آدام‌لار جینلی!
*
پوفله بارماق‌لاریمی!
شمع تاپانمادیم؛
                یاندیم!
*
دالی دنده‌ده دونیا،
ایره‌لی له‌مه‌یینه چوخ دا اینانما!
*
“ائولری وار خانا خانا…”
ائولریمیز،
نقطه‌لر آراسیندا توتدوغوموز خانالار!
*
گؤزلری، قوش‌لارین سایینی ساخلیر
گؤی کیچیلیر!
*
دایان! من سنم، من صنم؟
گؤروم تانیرام، من نه من ام؟
*
ایپه گلر بوینوم،
         ساپا یوخ!
*
توستونون ایستیسی له ده
قالماق اولارمیش،
دئمه به!

ممکن است این نوشته‌ها را هم بپسندید ...

پاسخ دهید

نشانی ایمیل شما منتشر نخواهد شد. بخش‌های موردنیاز علامت‌گذاری شده‌اند *